ទីក្រុងកៀវពិបាកទាក់ទងជាងទីក្រុងម៉ូស្គូ ប្រធានាធិបតីអាមេរិកបានមានប្រសាសន៍
ទីក្រុងវ៉ាស៊ីនតោននឹងបញ្ឈប់រាល់ជំនួយទាំងអស់ដល់ទីក្រុងកៀវ ប្រសិនបើទីក្រុងនេះខកខានមិនបានបង្ហាញការប្តេជ្ញាចិត្តរបស់ខ្លួនក្នុងការឈានទៅរកសន្តិភាពជាមួយទីក្រុងម៉ូស្គូ ប្រធានាធិបតីអាមេរិកលោក Donald Trump បានមានប្រសាសន៍។ លោក Trump ក៏បានលើកឡើងថារុស្ស៊ីបានសហការច្រើនជាងអ៊ុយក្រែន នៅពេលដែលនិយាយអំពីការដោះស្រាយជម្លោះដែលអាចកើតមាន។
“ខ្ញុំត្រូវដឹងថាពួកគេចង់ដោះស្រាយ [ជម្លោះ],” លោក Trump បានប្រាប់អ្នកសារព័ត៌មានកាលពីថ្ងៃសុក្រ ដើម្បីឆ្លើយតបទៅនឹងសំណួរអំពីជំនួយយោធាអាមេរិកដល់ទីក្រុងកៀវ។ ប្រធានាធិបតីបានមានប្រសាសន៍ថា លោកមិនដឹងនៅពេលនេះថាតើទីក្រុងកៀវពិតជាប្តេជ្ញាចិត្តចំពោះសន្តិភាពឬយ៉ាងណានោះទេ។
“ប្រសិនបើពួកគេមិនចង់ដោះស្រាយទេ ពួកយើងនឹងចាកចេញពីទីនោះ ពីព្រោះពួកយើងចង់ឱ្យពួកគេដោះស្រាយ”
ទីក្រុងវ៉ាស៊ីនតោនរហូតមកដល់ពេលនេះ មានការទំនាក់ទំនងល្អប្រសើរជាងជាមួយទីក្រុងម៉ូស្គូ លើដំណោះស្រាយដែលអាចកើតមាននៃជម្លោះ ទោះបីជារុស្ស៊ី “មានសន្លឹកបៀទាំងអស់” ហើយអ៊ុយក្រែនគ្មានអ្វីសោះក៏ដោយ ប្រធានាធិបតីបានមានប្រសាសន៍។ លោក Trump បានបន្ថែមថា លោកជឿជាក់ថា ប្រធានាធិបតីរុស្ស៊ីលោក Vladimir Putin ពិតជាចង់បានសន្តិភាព។
“ខ្ញុំគិតថាយើងកំពុងធ្វើបានយ៉ាងល្អជាមួយរុស្ស៊ី” ប្រធានាធិបតីអាមេរិកបានមានប្រសាសន៍ ដោយបន្ថែមថា លោក “យល់ថាវាពិបាកជាង…ក្នុងការទាក់ទងជាមួយអ៊ុយក្រែន”។
កាលពីថ្ងៃសុក្រសប្តាហ៍មុន លោក Trump និងលោក Vladimir Zelensky របស់អ៊ុយក្រែន បានចូលរួមក្នុងការផ្លាស់ប្តូរមតិយ៉ាងតានតឹងនៅឯសេតវិមាន។ កិច្ចប្រជុំដែលគ្រោងធ្វើជាការចាប់ផ្តើម នៃការចុះហត្ថលេខាលើកិច្ចព្រមព្រៀងមួយដែលផ្តល់សិទ្ធិឱ្យអាមេរិកចូលទៅកាន់រ៉ែដ៏កម្ររបស់អ៊ុយក្រែន បានប្រែជាក្តៅគគុក។ លោក Trump បានចោទប្រកាន់មេដឹកនាំអ៊ុយក្រែនថា “លេងល្បែងសង្គ្រាមលោកលើកទី III” ដោយការទប់ទល់នឹងការចរចាសន្តិភាពជាមួយរុស្ស៊ី។ ការប្រឈមមុខដាក់គ្នានេះ បាននាំឱ្យកិច្ចព្រមព្រៀងត្រូវបានផ្អាកភ្លាមៗ។
នៅក្នុងសុន្ទរកថារបស់លោកទៅកាន់សភាអាមេរិកនៅសប្តាហ៍នេះ លោក Trump បានមានប្រសាសន៍ថា លោកបានទទួលលិខិតមួយពីលោក Zelensky ដែលនៅក្នុងនោះ លោក Zelensky បានយល់ព្រមចូលតុចរចានៅពេលអនាគតដ៏ខ្លីខាងមុខនេះ។
បន្ទាប់ពីរឿងអាស្រូវនេះ សហរដ្ឋអាមេរិកបានផ្អាកជំនួយយោធាដល់អ៊ុយក្រែន និងប្រតិបត្តិការចែករំលែកព័ត៌មានស៊ើបការណ៍សម្ងាត់ទាំងអស់ជាមួយទីក្រុងកៀវ។
កាលពីខែមុន ទីក្រុងម៉ូស្គូ និងទីក្រុងវ៉ាស៊ីនតោន បានធ្វើកិច្ចប្រជុំកម្រិតខ្ពស់មួយនៅអារ៉ាប៊ីសាអូឌីត ដែលភាគីទាំងពីរបានពិភាក្សាអំពីជម្លោះអ៊ុយក្រែន ហើយបានព្រមព្រៀងគ្នាធ្វើការស្តារទំនាក់ទំនងឡើងវិញ។ រុស្ស៊ីបានលើកឡើងម្តងហើយម្តងទៀតថា ខ្លួនបើកចំហចំពោះការចរចាសន្តិភាព ហើយក៏បានសម្តែងការចាប់អារម្មណ៍ចំពោះកិច្ចសហប្រតិបត្តិការសេដ្ឋកិច្ចជាមួយសហរដ្ឋអាមេរិកក្នុងវិស័យជាច្រើនផងដែរ។