` tags.
`
ការដាក់ពន្ធចំនួន 25% លើទំនិញកាណាដារបស់អាមេរិកគឺមិនត្រឹមត្រូវនោះទេ នេះបើតាមការលើកឡើងរបស់នាយករដ្ឋមន្ត្រី
លោកប្រធានាធិបតីអាមេរិក Donald Trump បានសម្រេចចិត្តដាក់ពន្ធលើកាណាដាគឺពិតជាមិនត្រឹមត្រូវនោះទេ នេះបើតាមការលើកឡើងរបស់នាយករដ្ឋមន្ត្រី Justin Trudeau ។
ពន្ធរបស់លោក Trump ចំនួន 25% លើទំនិញកាណាដា និង 10% លើថាមពលកាណាដា បានចូលជាធរមានកាលពីថ្ងៃអង្គារ បន្ទាប់ពីមានការពន្យារពេលមួយខែ។
លោក Trump ធ្លាប់បានចោទប្រកាន់ទីក្រុង Ottawa ពីការអនុវត្តពាណិជ្ជកម្មមិនយុត្តិធម៌ និងបានលើកឡើងថា កាណាដានឹងប្រសើរជាងប្រសិនបើជា “រដ្ឋទី 51” របស់សហរដ្ឋអាមេរិក។
“យើងមិនចង់បានរឿងនេះទេ។ យើងចង់ធ្វើការជាមួយអ្នកជាមិត្តនិងជាសម្ព័ន្ធមិត្ត ហើយយើងក៏មិនចង់ឃើញអ្នកឈឺចាប់ដែរ ប៉ុន្តែរដ្ឋាភិបាលរបស់អ្នកបានជ្រើសរើសធ្វើបែបនេះចំពោះអ្នក” នេះបើតាមការលើកឡើងរបស់លោក Trudeau ក្នុងសុន្ទរកថាតាមកញ្ចក់ទូរទស្សន៍។
“ពួកគេបានជ្រើសរើសបើកសង្គ្រាមពាណិជ្ជកម្មដែលនឹងបង្កគ្រោះថ្នាក់ជាចម្បងដល់គ្រួសារអាមេរិក”។
“អនុញ្ញាតឱ្យខ្ញុំបញ្ជាក់ឱ្យច្បាស់ថា មិនមានហេតុផលណាមួយសម្រាប់សកម្មភាពទាំងនេះនោះទេ” នេះបើតាមការអះអាងរបស់នាយករដ្ឋមន្ត្រី។ លោកបានបន្ថែមថា កាណាដាបាន “ខិតខំប្រឹងប្រែងយ៉ាងខ្លាំង” ដើម្បីទប់ស្កាត់ការដឹកជញ្ជូនសារធាតុ fentanyl ឆ្លងកាត់ព្រំដែន។ ការរឹបអូសគ្រឿងញៀនដែលមកពីកាណាដាបានធ្លាក់ចុះ 97% ចន្លោះខែធ្នូ ឆ្នាំ 2024 និងខែមករា ឆ្នាំ 2025 នេះបើតាមការលើកឡើងរបស់លោក។
លោក Trudeau បានបញ្ចប់សុន្ទរកថារបស់លោកដោយលើកឡើងពីអត្ថបទវិចារណកថាថ្មីៗនេះនៅក្នុងទស្សនាវដ្ដី Wall Street Journal ដែលបានពណ៌នាពន្ធរបស់លោក Trump ថាជា “ពន្ធដែលល្ងង់បំផុតក្នុងប្រវត្តិសាស្ត្រ”
“មិនមែនជាទម្លាប់របស់ខ្ញុំក្នុងការយល់ស្របជាមួយ The Wall Street Journal នោះទេ ប៉ុន្តែ Donald ពួកគេបានចង្អុលបង្ហាញថា ទោះបីជាអ្នកជាមនុស្សឆ្លាតខ្លាំងក៏ដោយ រឿងនេះគឺជារឿងល្ងង់ខ្លាំងណាស់ដែលត្រូវធ្វើ” នេះបើតាមការលើកឡើងរបស់លោក Trudeau។ នាយករដ្ឋមន្ត្រីបានសន្យាថា កាណាដានឹងឆ្លើយតបវិញដោយដាក់ពន្ធ 25% លើទំនិញអាមេរិក។
លោក Trump បានច្រានចោលការឆ្លើយតបរបស់លោក Trudeau កាលពីថ្ងៃអង្គារ ដោយហៅលោកយ៉ាងចំអកថា “អភិបាល”។
“សូមពន្យល់ដល់អភិបាល Trudeau នៃប្រទេសកាណាដាផងថា នៅពេលដែលគាត់ដាក់ពន្ធសងសឹកលើសហរដ្ឋអាមេរិក ពន្ធទៅវិញទៅមករបស់យើងនឹងកើនឡើងភ្លាមៗក្នុងចំនួនដូចគ្នា!” នេះបើតាមការសរសេររបស់លោកនៅលើវេទិកា Truth Social របស់លោក។