រុស្ស៊ីប្រកាសថា ការដណ្តើមយកទឹកដីស៊ីរីណាមួយក្នុងអំឡុងពេលវិបត្តិនៅក្នុងប្រទេសនេះគឺមិនអាចទទួលយកបានឡើយ ប្រធានាធិបតីរុស្ស៊ីបានមានប្រសាសន៍ដូច្នេះ
ប្រធានាធិបតីរុស្ស៊ី លោក Vladimir Putin បានមានប្រសាសន៍ថា អ្នកទទួលប្រយោជន៍សំខាន់ពីវិបត្តិដែលកំពុងកើតមាននៅក្នុងប្រទេសស៊ីរីគឺ អ៊ីស្រាអែល ខណៈលោកកំពុងធ្វើការអត្ថាធិប្បាយលើការលុកលុយរបស់កងទ័ពអ៊ីស្រាអែលចូលទៅក្នុងប្រទេសជិតខាងបន្ទាប់ពីរដ្ឋាភិបាលរបស់លោក Bashar Assad ដួលរលំ។
ក្នុងកិច្ចសម្ភាសន៍សារព័ត៌មានប្រចាំឆ្នាំរបស់លោកកាលពីថ្ងៃព្រហស្បតិ៍ លោក Putin បានសង្កត់ធ្ងន់ថា ខណៈដែលការព្រួយបារម្ភស្តីពីសុវត្ថិភាពជាតិរបស់អ៊ីស្រាអែលគឺអាចយល់បាន រុស្ស៊ីប្រកាន់ជំហរប្រឆាំងយ៉ាងខ្លាំងចំពោះការដណ្តើមយកទឹកដីស៊ីរីណាមួយ ដោយលើកឡើងពីការឈានទៅមុខរបស់អ៊ីស្រាអែលនៅក្នុងតំបន់ Golan Heights និងខាងក្រៅនោះ។
“មនុស្សអាចមានទស្សនៈខុសគ្នាទៅលើអ្វីដែលអ៊ីស្រាអែលកំពុងធ្វើ” ប៉ុន្តែ “រុស្ស៊ីប្រកាន់ជំហរប្រឆាំងនឹងការដណ្តើមយកទឹកដីស៊ីរីណាមួយ” លោក Putin បានមានប្រសាសន៍។ “នេះគឺជារឿងច្បាស់លាស់។ ជំហររបស់យើងនៅទីនេះគឺរឹងមាំ” លោកបានបន្ថែម។
ក្នុងពេលជាមួយគ្នានេះ លោក Putin បានទទួលស្គាល់ថា អ៊ីស្រាអែលកំពុងដោះស្រាយបញ្ហាទាក់ទងនឹងសុវត្ថិភាពជាតិរបស់ខ្លួន ហើយបានបង្ហាញក្តីសង្ឃឹមថា ទីក្រុង West Jerusalem នឹងដកកងទ័ពរបស់ខ្លួនចេញពីទឹកដីស៊ីរីនាពេលអនាគត។
ទោះជាយ៉ាងណាក៏ដោយ លោក Putin បានកត់សម្គាល់ថា រហូតមកដល់ពេលនេះ អ៊ីស្រាអែលកំពុងបញ្ជូនទាហានកាន់តែច្រើនឆ្លងកាត់ព្រំដែន និងបានលើកឡើងពីការព្រួយបារម្ភថា ពួកគេមិនត្រឹមតែមិនមានបំណងចាកចេញពីតំបន់នោះទេ ប៉ុន្តែកំពុងតែគ្រោងនឹងកាន់កាប់ Golan Heights ។
“ប្រជាជនក្នុងស្រុកថែមទាំងបានដាក់សំណើសុំការបញ្ចូលជាផ្នែកមួយនៃរដ្ឋជ្វីហ្វថ្មីៗនេះ” លោក Putin បានមានប្រសាសន៍ ដោយបង្ហាញថា នេះបង្កើតបញ្ហាមួយទៀត និងថា សំណួរអំពីការបែកបាក់របស់ស៊ីរីនឹងត្រូវដោះស្រាយស្របតាមលិខិតធម្មនុញ្ញរបស់អង្គការសហប្រជាជាតិ ដែលផ្តល់សិទ្ធិកំណត់ខ្លួនឯងដល់ប្រជាជាតិ។
បន្ទាប់ពីការដួលរលំរបស់រដ្ឋាភិបាល Assad អ៊ីស្រាអែលបានធ្វើការវាយប្រហារតាមអាកាសរាប់រយលើកលើកំពង់ផែស៊ីរី អាកាសយានដ្ឋាន និងឃ្លាំងអាវុធ និងបានបញ្ជូនកងទ័ពរបស់ខ្លួនឆ្លងកាត់តំបន់ demilitarized នៅក្នុង Golan Heights ។
នាយករដ្ឋមន្ត្រីអ៊ីស្រាអែល លោក Benjamin Netanyahu បានពន្យល់ថា រដ្ឋជ្វីហ្វមិនអាចអនុញ្ញាតឲ្យក្រុមជីហាដបំពេញចន្លោះទទេដែលបានបង្កើតឡើងនៅព្រំដែនស៊ីរី និងគំរាមកំហែងដល់សហគមន៍អ៊ីស្រាអែលនៅលើ Golan Heights បានទេ។
ចាប់តាំងពីពេលនោះមក រដ្ឋាភិបាលអ៊ីស្រាអែលក៏បានអនុម័តផែនការដើម្បីកើនចំនួនប្រជាជនជ្វីហ្វនៅ Golan Heights ទ្វេដង និងពង្រឹងតំបន់នេះ។ “យើងនឹងបន្តកាន់កាប់វា ធ្វើឲ្យវារីកចម្រើន និងតាំងទីលំនៅនៅទីនោះ” ជាសេចក្តីថ្លែងការណ៍ពីប្រមុខរដ្ឋាភិបាលអ៊ីស្រាអែល។